ಜಪಾನ್‌ನಿಂದ ಕೇಳಿಬಂದಿರುವ ಈ ಭಯಾನಕ ಘಟನೆ ಇಡೀ ವಿಶ್ವವನ್ನೇ ಬೆಚ್ಚಿಬೀಳಿಸಿದೆ. ಬ್ರೇಕಪ್‌ನಿಂದ ತೀವ್ರ ದುಃಖಿತಳಾದ ಯುವತಿಯೊಬ್ಬಳು ತನ್ನ ಪ್ರಿಯಕರನ ಕೈಬೆರಳನ್ನೇ ಕತ್ತರಿಸಿ ಫ್ರಿಜ್‌ನಲ್ಲಿಟ್ಟಿರುವ ಅಮಾನವೀಯ ಕೃತ್ಯ ಬೆಳಕಿಗೆ ಬಂದಿದೆ. ಪ್ರೀತಿಯಲ್ಲಿ ಹುಟ್ಟುವ ಅತಿಯಾದ possessiveness ಎಂತಹ ಘೋರ ಕೃತ್ಯಕ್ಕೂ ಎಡೆಮಾಡಿಕೊಡಬಹುದು ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ.
ಜಪಾನ್‌ನ ಹೊನ್ಶು ದ್ವೀಪದ ಕನ್ಸೈ ಪ್ರದೇಶದ ಒಸಾಕಾದಲ್ಲಿ ಈ ಆಘಾತಕಾರಿ ಘಟನೆ ನಡೆದಿದೆ. 21 ವರ್ಷದ ಯುವಕನೊಬ್ಬ ಸ್ವತಃ ಪೊಲೀಸರಿಗೆ ಕರೆ ಮಾಡಿ ತನಗೆ ಸಂಭವಿಸಿದ ಈ ಭಯಾನಕ ದುರಂತದ ಬಗ್ಗೆ ವಿವರಿಸಿದ್ದಾನೆ. ಆತನ ಗುರುತನ್ನು ಗೌಪ್ಯವಾಗಿಡಲಾಗಿದೆ.
ಸೌತ್ ಚೀನಾ ಮಾರ್ನಿಂಗ್ ಪೋಸ್ಟ್ ವರದಿಯ ಪ್ರಕಾರ, ಬ್ರೇಕಪ್ ವಿಚಾರವಾಗಿ ವಾಗ್ವಾದ ನಡೆದ ನಂತರ ಆತನ ಪ್ರೇಯಸಿ ಸಾಕಿ ಸಾಟೊ ತನ್ನ ಮೇಲೆ ಹಲ್ಲೆ ನಡೆಸಿದ್ದಾಳೆ ಎಂದು ಯುವಕ ಪೊಲೀಸರಿಗೆ ತಿಳಿಸಿದ್ದಾನೆ. ಹೇಗೋ ಮಾಡಿ ಆತ ಪೊಲೀಸರ ಸಹಾಯ ಕೋರಿದ್ದು, ತಕ್ಷಣ ಕಾರ್ಯಪ್ರವೃತ್ತರಾದ ಪೊಲೀಸರು ಘಟನಾ ಸ್ಥಳಕ್ಕೆ ಧಾವಿಸಿದಾಗ ಇಬ್ಬರೂ ಒಂದೇ ಫ್ಲಾಟ್‌ನಲ್ಲಿ ಪತ್ತೆಯಾಗಿದ್ದಾರೆ. ಆ ಯುವಕನ ಎಡ ಕೆನ್ನೆ ಮತ್ತು ಮೂಗಿನ ಮೇಲೆ ಗಾಯದ ಗುರುತುಗಳು ಸ್ಪಷ್ಟವಾಗಿ ಕಾಣುತ್ತಿದ್ದವು.
ವರದಿಯ ಪ್ರಕಾರ, 2023ರಲ್ಲಿ 19 ವರ್ಷದವನಿದ್ದಾಗ ಯುವಕ ಆನ್‌ಲೈನ್‌ನಲ್ಲಿ ಸಾಟೊಳ ಕೆಲವು ಚಿತ್ರಗಳನ್ನು ನೋಡಿದ್ದ. ಆಕೆಯ ಮುಗ್ಧ ನೋಟಕ್ಕೆ ಮಾರುಹೋಗಿದ್ದ ಆತ, ಸ್ವಲ್ಪ ಸಮಯದಲ್ಲೇ ಆಕೆಯೊಂದಿಗೆ ಪ್ರೀತಿಯಲ್ಲಿ ಬಿದ್ದಿದ್ದ. ನಂತರ ಇಬ್ಬರೂ ಜುಲೈನಿಂದ ಒಟ್ಟಿಗೆ ವಾಸಿಸಲಾರಂಭಿಸಿದ್ದರು. ಆದರೆ, ದಿನ ಕಳೆದಂತೆ ಸಾಟೊಳ ನಿಜವಾದ ಮುಖ ಅನಾವರಣಗೊಳ್ಳಲು ಪ್ರಾರಂಭಿಸಿತು. ಆಕೆ ಅತಿಯಾದ ಪ್ರಾಬಲ್ಯ ಹೊಂದಿರುವ ಸ್ವಭಾವದವಳಾಗಿದ್ದಳು. ತಾನು ಹೇಳಿದ್ದೆಲ್ಲ ಸರಿ ಎಂದು ಒಪ್ಪಿಕೊಳ್ಳುವ ಹುಡುಗರನ್ನೇ ಆಕೆ ಇಷ್ಟಪಡುತ್ತಿದ್ದಳು. ಕೆಲವೇ ದಿನಗಳಲ್ಲಿ ಆಕೆ ತನ್ನ ಪ್ರಿಯಕರನನ್ನು ಸಂಪೂರ್ಣವಾಗಿ ನಿಯಂತ್ರಿಸಲು ಪ್ರಾರಂಭಿಸಿದಳು. ಅವನ ಬ್ಯಾಂಕ್ ಪಾಸ್‌ಬುಕ್ ಮತ್ತು ಸ್ಮಾರ್ಟ್‌ಫೋನ್ ಅನ್ನು ತನ್ನ ವಶಕ್ಕೆ ತೆಗೆದುಕೊಂಡಿದ್ದಳು.
ಇದನ್ನೂ ಓದಿ: ಹೆಂಡತಿ ಕಾಟಕ್ಕೆ ಬೇಸತ್ತು ಲೈವ್ ನಲ್ಲೆ ಪ್ರಾಣ ಬಿಟ್ಟ IT ಕಂಪನಿ ಮ್ಯಾನೇಜರ್
ಅಕ್ಟೋಬರ್ ತಿಂಗಳಲ್ಲಿ, ಬ್ರೇಕಪ್ ಬಗ್ಗೆ ಚರ್ಚೆ ನಡೆಯುತ್ತಿದ್ದಾಗ, ಕೋಪಗೊಂಡ ಸಾಟೊ ಚಾಕುವಿನಿಂದ ಯುವಕನ ಉಂಗುರದ ಬೆರಳನ್ನು ಕತ್ತರಿಸಿ ಮದ್ಯದಲ್ಲಿ ಹಾಕಿ ಫ್ರಿಡ್ಜ್‌ನಲ್ಲಿ ಇಟ್ಟಿದ್ದಳು! ಆದರೆ, ಆರೋಪಿ ಗೆಳತಿ ಮಾತ್ರ ಯುವಕನೇ ಸ್ವಯಂ ಪ್ರೇರಿತನಾಗಿ ಹೀಗೆ ಮಾಡಿಕೊಂಡಿದ್ದಾನೆ ಎಂದು ವಾದಿಸುತ್ತಿದ್ದಾಳೆ. ಆದರೆ ಪೊಲೀಸರು ಆಕೆಯ ಹೇಳಿಕೆಯನ್ನು ನಂಬಲು ಸಿದ್ಧರಿಲ್ಲ. ಈ ಕುರಿತು ತನಿಖೆ ಮುಂದುವರೆದಿದೆ.
ಇಷ್ಟೆಲ್ಲಾ ಕಿರುಕುಳದ ನಡುವೆಯೂ ಯುವಕ ಪೊಲೀಸರಿಗೆ ದೂರು ನೀಡಲು ಹಿಂಜರಿದಿದ್ದ. ಇದಕ್ಕೆ ಕಾರಣ ಆತ ತನ್ನ ಗೆಳತಿಯನ್ನು ಅತಿಯಾಗಿ ಪ್ರೀತಿಸುತ್ತಿದ್ದ. “ಗೆಳತಿ ತುಂಬಾ ಸುಂದರಿಯಾಗಿದ್ದಳು. ಆಕೆಯನ್ನು ಬಿಟ್ಟು ಹೋಗಲು ಸಾಧ್ಯವಾಗಲಿಲ್ಲ, ಆದ್ದರಿಂದ ಅವಳ ಕಿರುಕುಳವನ್ನು ಸಹಿಸಿಕೊಂಡೆ ಮತ್ತು ಈ ಬಗ್ಗೆ ಯಾರಿಗೂ ಹೇಳಲಿಲ್ಲ” ಎಂದು ಆತ ಪೊಲೀಸರಿಗೆ ತಿಳಿಸಿದ್ದಾನೆ. ಈ ಹೇಳಿಕೆಯು ಪ್ರೀತಿಯ ಹೆಸರಿನಲ್ಲಿ ನಡೆಯುವ ದೌರ್ಜನ್ಯದ ಆಳವನ್ನು ತೋರಿಸುತ್ತದೆ.
ಈ ಘಟನೆ ಜಪಾನಿನ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಆಕ್ರೋಶ ಮತ್ತು ಆಘಾತವನ್ನುಂಟುಮಾಡಿದೆ. ಪ್ರೀತಿಯ ವ್ಯಾಖ್ಯಾನವನ್ನೇ ತಿರುಚಿ, ಹಿಂಸೆಗೆ ಇಳಿಯುವ ಇಂತಹ ಮನಸ್ಥಿತಿಗಳ ಬಗ್ಗೆ ವ್ಯಾಪಕ ಚರ್ಚೆಗಳು ನಡೆಯುತ್ತಿವೆ. ಬ್ರೇಕಪ್ ಎನ್ನುವುದು ಒಂದು ಸಂಬಂಧದ ಅಂತ್ಯವಾಗಿದ್ದರೂ, ಅದು ಹಿಂಸೆಗೆ ತಿರುಗುವುದು ಅತ್ಯಂತ ದುರದೃಷ್ಟಕರ ಮತ್ತು ಖಂಡನೀಯ. ಈ ಘಟನೆಯು ಪ್ರೀತಿಯಲ್ಲಿ ಆರೋಗ್ಯಕರ ಸಂಬಂಧ ಮತ್ತು ವೈಯಕ್ತಿಕ ಸ್ವಾತಂತ್ರ್ಯದ ಮಹತ್ವವನ್ನು ಮತ್ತೊಮ್ಮೆ ಎತ್ತಿ ತೋರಿಸುತ್ತದೆ. ಪೊಲೀಸರು ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದು, ಆರೋಪಿಗೆ ಕಠಿಣ ಶಿಕ್ಷೆಯಾಗುವ ನಿರೀಕ್ಷೆಯಿದೆ.
ಇದನ್ನೂ ಓದಿ: ಕ್ಲೀನರ್ ನೆಲ ಒರೆಸೋ ಸ್ಟೈಲ್‌ಗೆ ಡಾಕ್ಟರ್ ಫಿದಾ!
Abhishek is an accomplished journalist with four years of experience in the media industry. He possesses extensive expertise in news collection, reporting, interviewing, and analyzing diverse contemporary issues, crafting engaging and informative content.
