- ಜಾಮೀನಿನ ಬಳಿಕ ಶಿವರಾಜ್‌ಕುಮಾರ್ ಭೇಟಿ ಯತ್ನ, ದರ್ಶನ್‌ಗೆ ಕ್ಷಮೆ ವಿಡಿಯೋ
- “ನಾನೊಬ್ಬ ಪುಟ್ಟ ಕಲಾವಿದ, ಕ್ಷಮಿಸಿ ಡಿ ಬಾಸ್” ಎಂದು ಭಾವನಾತ್ಮಕ ಮನವಿ
- ಮನು ನೀಡಿದ ವಿವಾದಾತ್ಮಕ ಆಡಿಯೋ ವೈರಲ್, ಚಿತ್ರರಂಗದಲ್ಲಿ ಚರ್ಚೆ
ಕಾಮಿಡಿ ಕಿಲಾಡಿಗಳು ಶೋ ಮೂಲಕ ಗುರುತಿಸಿಕೊಂಡು, ಈಗ ನಾಯಕ ನಟನಾಗಲು ಸಿದ್ಧವಾಗಿದ್ದ ಮಡೆನೂರು ಮನು ಅವರ ವಿಚಾರದಲ್ಲಿ ಇತ್ತೀಚೆಗೆ ದೊಡ್ಡ ಸದ್ದು ಮಾಡಿತ್ತು. ನಟರಾದ ಶಿವರಾಜ್‌ಕುಮಾರ್, ದರ್ಶನ್ ಹಾಗೂ ಧ್ರುವ ಸರ್ಜಾ ಅವರ ಬಗ್ಗೆ ಮನು ಅವಹೇಳನಕಾರಿಯಾಗಿ ಮಾತನಾಡಿದ್ದ ಒಂದು ಆಡಿಯೋ ಕ್ಲಿಪ್ ವೈರಲ್ ಆಗಿತ್ತು. ಈ ಆಡಿಯೋ ವೈರಲ್ ಆಗುತ್ತಿದ್ದಂತೆ, ಸಹಜವಾಗಿಯೇ ಈ ಮೂವರು ನಟರ ಅಭಿಮಾನಿಗಳು ತೀವ್ರ ಆಕ್ರೋಶ ಹೊರಹಾಕಿದ್ದರು.
ಸಾಮಾಜಿಕ ಜಾಲತಾಣಗಳಲ್ಲಿ ಮನು ವಿರುದ್ಧ ತೀವ್ರ ಟೀಕೆಗಳು, ಷರಾಬಾರಿಗಳು ಕೇಳಿಬಂದಿದ್ದವು. ಈ ಘಟನೆ ಅವರ ‘ಕುಲದಲ್ಲಿ ಕೀಳ್ಯಾವುದೋ’ ಸಿನಿಮಾ ಬಿಡುಗಡೆಯ ಹೊತ್ತಲ್ಲೇ ನಡೆದದ್ದು ಮತ್ತಷ್ಟು ಸಂಕಷ್ಟ ತಂದಿತ್ತು. ಇದರ ಜೊತೆಗೆ, ಅವರ ವಿರುದ್ಧ ಲೈಂಗಿಕ ದೌರ್ಜನ್ಯ ಆರೋಪವೂ ಕೇಳಿಬಂದು, ದೂರು ದಾಖಲಾಗಿ ಬಂಧನವೂ ಆಗಿದ್ದರು.
ಜಾಮೀನು ಪಡೆದು ಜೈಲಿನಿಂದ ಹೊರ ಬಂದ ನಂತರ, ಮಡೆನೂರು ಮನು ಮೊದಲು ನಟ ಶಿವರಾಜ್‌ಕುಮಾರ್ ಅವರ ಮನೆಗೆ ಹೋಗಿದ್ದರು. ಆದರೆ, ಆ ವೇಳೆ ಶಿವರಾಜ್‌ಕುಮಾರ್ ಅವರು ಸಿಗದೇ ಇದ್ದ ಕಾರಣ ವಾಪಸ್ ಬಂದಿದ್ದರು. ಈಗ, ಮಡೆನೂರು ಮನು, ನಟ ದರ್ಶನ್ ಅವರ ಬಳಿ ಬಹಿರಂಗವಾಗಿ ಕ್ಷಮೆ ಕೇಳಿದ್ದಾರೆ.
ವಿಡಿಯೋ ಒಂದರಲ್ಲಿ ಮಾತನಾಡಿದ ಮನು, ದರ್ಶನ್ ಅಭಿಮಾನಿಗಳು ತಮಗೆ ಫೋನ್ ಕರೆಗಳು ಮತ್ತು ಮೆಸೇಜ್‌ಗಳನ್ನು ಮಾಡಿ, “ಕ್ಷಮೆ ಕೇಳಿದ್ರಾ, ಅವರನ್ನು ಭೇಟಿಯಾದ್ರಾ?” ಎಂದು ಕೇಳುತ್ತಿದ್ದರು ಎಂದು ಹೇಳಿದ್ದಾರೆ. ಹಲವರು, “ಒಂದು ಸರಿ ಭೇಟಿಯಾಗಿ” ಎಂದು ಹೇಳಿದ್ದರು. ಆದರೆ, ನಟ ದರ್ಶನ್ ಅವರು ಸದ್ಯ ತುಂಬಾ ಬ್ಯುಸಿಯಾಗಿದ್ದಾರೆ ಎಂದು ತಮಗೆ ಗೊತ್ತಾಯಿತು ಎಂದಿದ್ದಾರೆ.
ಇದನ್ನೂ ಓದಿ: ಬಿಗ್ ಬಾಸ್ ಕನ್ನಡ 12ಕ್ಕೆ ಬರ್ತಿದ್ದಾರೆ ಈ ನಾಲ್ವರು ಸೆಲೆಬ್ರಿಟಿಗಳು! ಒಬ್ಬರಂತೂ ಸಖತ್ ಫೇಮಸ್ ನಟಿ!
ನಂತರ, ಮನು ತಮ್ಮ ಮನದಾಳದ ಮಾತುಗಳನ್ನು ಆಡಿದ್ದಾರೆ. “ಡಿ ಬಾಸ್, ನಾನೊಬ್ಬ ಪುಟ್ಟ ಕಲಾವಿದ. ಒಂದು ಸಂಘ, ಸಹವಾಸಗಳನ್ನು ಮಾಡಿ, ಜೊತೆಯಲ್ಲಿ ಇರುವವರನ್ನು ನಂಬಿ ಈ ಆಡಿಯೋದಿಂದ ನಾನು ಬಲಿಯಾಗಿದ್ದೇನೆ.” ಎಂದು ಹೇಳಿ, “ದಯವಿಟ್ಟು ನನ್ನ ಕ್ಷಮಿಸಿ..ಕ್ಷಮಿಸಿ..ಕ್ಷಮಿಸಿ..” ಎಂದು ಅಂಗಲಾಚಿದ್ದಾರೆ.
ಇಡೀ ಡಿ ಬಾಸ್ ಅಭಿಮಾನಿಗಳು, ಕರ್ನಾಟಕದ ಜನತೆಗೆ ನನಗೆ ಒಂದು ಜೀವದಾನ ಕೊಟ್ಟಿದ್ದೀರಿ. ನನ್ನ ಉಸಿರು ಇರುವವರೆಗೂ ನಿಮ್ಮನ್ನು ಮರೆಯೋದಿಲ್ಲ. ಈ ಪುಟ್ಟ ಕಲಾವಿದನನ್ನು ಕ್ಷಮಿಸಿ ಎಂದು ಭಾವನಾತ್ಮಕವಾಗಿ ಅಂಗಲಾಚಿ ಬೇಡಿಕೊಂಡಿದ್ದಾರೆ. ಅವರ ಮಾತುಗಳಲ್ಲಿ ಒಂದು ಬಗೆಯ ಪಶ್ಚಾತ್ತಾಪ ಮತ್ತು ಭವಿಷ್ಯದ ಬಗ್ಗೆ ಆತಂಕ ಸ್ಪಷ್ಟವಾಗಿ ಕಾಣುತ್ತಿತ್ತು.
Lakshmi is an accomplished writer with six years of experience in the media industry. She possesses extensive expertise in covering a diverse range of topics, including entertainment, job-related insights, and comprehensive updates on government schemes.
