- ಬಕ್ರೀದ್ ಹಬ್ಬಕ್ಕೆ ಗೋವು ಕಳ್ಳತನ ಮಾಡಿ ಸಾಗಿಸುತ್ತಿದ್ದ ಐವರ ಬಂಧನ
- ರಕ್ಷಿಸಲ್ಪಟ್ಟ ಎರಡು ಆಕಳುಗಳಿಗೆ ಚಿಕಿತ್ಸೆ, ಗೋಶಾಲೆಗೆ ರವಾನೆ
- ಇಬ್ಬರು ಆರೋಪಿಗಳು ಪರಾರಿ, ಅವರಿಗಾಗಿ ಶೋಧ ಮುಂದುವರಿಕೆ
ಬಕ್ರೀದ್ ಹಬ್ಬದ ಸಲುವಾಗಿ ಗೋವುಗಳನ್ನು ಅಕ್ರಮವಾಗಿ ವಧೆ ಮಾಡಲು ಕದ್ದು ಸಾಗಿಸುತ್ತಿದ್ದ ಒಂದು ಭಯಾನಕ ಗ್ಯಾಂಗ್ ಅನ್ನು ಅಂಕೋಲಾ ಪೊಲೀಸರು ಸಿನಿಮೀಯ ರೀತಿಯಲ್ಲಿ ಬೆನ್ನಟ್ಟಿ ಬಂಧಿಸಿದ್ದಾರೆ. ತಮ್ಮ ಜೀವದ ಹಂಗು ತೊರೆದು ಗೋಕಳ್ಳರ ಮೇಲೆ ಕಾರು ಹತ್ತಿಸಿ ಕೊಲೆಗೆ ಯತ್ನಿಸಿದ್ದ ಖತರ್ನಾಕ್ ಆರೋಪಿಗಳನ್ನು ಹೆಡೆಮುರಿ ಕಟ್ಟಿ, ಎರಡು ಆಕಳುಗಳನ್ನು ರಕ್ಷಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಈ ಕಾರ್ಯಾಚರಣೆ ಜಿಲ್ಲೆಯಾದ್ಯಂತ ಸಾರ್ವಜನಿಕರ ಮತ್ತು ಗೋಪ್ರೇಮಿಗಳ ಮೆಚ್ಚುಗೆಗೆ ಪಾತ್ರವಾಗಿದೆ.
ಮಂಗಳೂರಿನಿಂದ ಬಂದಿದ್ದ ಆರೋಪಿಗಳ ತಂಡವು ಅಂಕೋಲಾ ಜಮಗೋಡ ರೈಲ್ವೆ ನಿಲ್ದಾಣದ ಕ್ರಾಸ್ ಬಳಿ ರಸ್ತೆ ಬದಿಯಲ್ಲಿ ಮಲಗಿದ್ದ ಎರಡು ಕಪ್ಪು ಆಕಳುಗಳನ್ನು ಕಳ್ಳತನ ಮಾಡಿತ್ತು. ಆಕಳುಗಳನ್ನು ಹಿಂಸಾತ್ಮಕವಾಗಿ ಕಾರಿನ ಹಿಂಬದಿ ಸೀಟ್‌ಗಳಲ್ಲಿ ತುಂಬಿ ಸಾಗಿಸುತ್ತಿದ್ದಾಗ, ಕರ್ತವ್ಯನಿರತರಾಗಿದ್ದ ಪಿ.ಎಸ್.ಐ ಉದ್ದಪ್ಪ ಧರೆಪ್ಪನವರ್ ಮತ್ತು ಅವರ ಸಿಬ್ಬಂದಿಗಳು ಕಾರನ್ನು ಗಮನಿಸಿ ಬೆನ್ನಟ್ಟಿದರು. ತಮ್ಮನ್ನು ಬೆನ್ನಟ್ಟುತ್ತಿದ್ದ ಪೊಲೀಸರ ಮೇಲೆ ಕಾರು ಹತ್ತಿಸಿ ಕೊಲೆಗೆ ಯತ್ನಿಸಿ ತಪ್ಪಿಸಿಕೊಳ್ಳಲು ಆರೋಪಿಗಳು ಪ್ರಯತ್ನಿಸಿದರು. ಆದರೂ, ತಮ್ಮ ಜೀವದ ಹಂಗು ತೊರೆದ ಪೊಲೀಸರು, ಎನ್‌ಎಚ್ 66 ರ ಬೆಳಸೆ ಸೊಣಗಿಮಕ್ಕಿ ಬಳಿ ಖತರ್ನಾಕ್ ಆರೋಪಿಗಳನ್ನು ಯಶಸ್ವಿಯಾಗಿ ಬಂಧಿಸುವಲ್ಲಿ ಸಫಲರಾಗಿದ್ದಾರೆ.
ಈ ಕಾರ್ಯಾಚರಣೆಯಲ್ಲಿ ಅಬ್ದುಲ್ ಅಜೀಮ ಅಬ್ದುಲ್ ಖಾದಿರ್ (48, ಸುರತ್ಕಲ್ ಕಾಟಿಪಾಳ್ಯ), ಮಹಮ್ಮದ್ ಮುಸ್ತಾಕ್ ಅಬ್ದುಲ್ ಹಮೀದ್ (25, ಸುರತ್ಕಲ್ ಚೊಕಬೆಟ್ಟು), ಮಹಮ್ಮದ್ ಸುಹಾನ್ ಅಬ್ಬೂಬಕರ್ (20, ಮೂಲ್ಕಿ), ಮಹಮ್ಮದ್ ಇರ್ಬಾಜ್ ಉಲ್ಲಾಳ (20, ಮಂಗಳೂರು ಉಲ್ಲಾಳ), ಮತ್ತು ಮಹಮ್ಮದ್ ಆಸಿಕ್ ಅಶ್ರಫ್ (22, ಸುರತ್ಕಲ್) ಎಂಬ ಐವರನ್ನು ಬಂಧಿಸಲಾಗಿದೆ. ಆದರೆ, ಮಂಗಳೂರಿನ ಮಹಮ್ಮದ್ ಅಜೀಮ ಮತ್ತು ಇನ್ನೋರ್ವ ಆರೋಪಿ ಸ್ಥಳದಿಂದ ತಪ್ಪಿಸಿಕೊಂಡು ಪರಾರಿಯಾಗಿದ್ದು, ಅವರ ಪತ್ತೆಗೆ ಪೊಲೀಸರು ತೀವ್ರ ಬಲೆ ಬೀಸಿದ್ದಾರೆ.
ಗೋವುಗಳಿಗೆ ಚಿಕಿತ್ಸೆ, ಸಾರ್ವಜನಿಕರಿಂದ ಮೆಚ್ಚುಗೆ
ಕಳ್ಳರ ದಾಳಿ ಮತ್ತು ಹಿಂಸಾತ್ಮಕ ಸಾಗಾಟದಿಂದ ಗಾಯಗೊಂಡಿದ್ದ ಆಕಳುಗಳಿಗೆ ಅಂಕೋಲಾ ತಾಲೂಕಾ ಪಶುವೈದ್ಯಕೀಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಯಿತು. ನಂತರ, ಪೊಲೀಸ್ ಮತ್ತು ಸಾರ್ವಜನಿಕರ ಸಹಕಾರದಲ್ಲಿ ಅವುಗಳಿಗೆ ಮೇವು ಮತ್ತು ನೀರು ನೀಡಿ ಆರೈಕೆ ಮಾಡಿ, ಬಳಿಕ ಗೋಶಾಲೆಗೆ ಕಳುಹಿಸಲು ಕ್ರಮ ಕೈಗೊಳ್ಳಲಾಗಿದೆ.
ಯಶಸ್ವೀ ಕಾರ್ಯಾಚರಣೆಯ ಹಿಂದಿನ ಕೈಗಳು
ಗೋಕಳ್ಳರ ಪಾಲಿಗೆ ಸಿಂಹಸ್ವಪ್ನವಾಗಿರುವ ಜಿಲ್ಲಾ ಪೊಲೀಸ್ ವರಿಷ್ಠ ಎಂ. ನಾರಾಯಣ, ಹೆಚ್ಚುವರಿ ಪೊಲೀಸ್ ಅಧೀಕ್ಷಕರಾದ ಕೃಷ್ಣಮೂರ್ತಿ, ಜಗದೀಶ ಎಂ, ಮತ್ತು ಡಿ.ವೈ.ಎಸ್.ಪಿ ಗಿರೀಶ್ ಅವರ ಮಾರ್ಗದರ್ಶನದಲ್ಲಿ ಈ ಕಾರ್ಯಾಚರಣೆ ನಡೆದಿದೆ. ಅಂಕೋಲಾ ಪೊಲೀಸ್ ನಿರೀಕ್ಷಕ ಚಂದ್ರಶೇಖರ ಮಠಪತಿ, ಪಿ.ಎಸ್.ಐ ಉದ್ದಪ್ಪ ಧರೆಪ್ಪನವರ್ ಮತ್ತು ಸಿಬ್ಬಂದಿಗಳಾದ ಎ.ಎಸ್.ಐ ಮಹಾಬಲೇಶ್ವರ ಗಡೇರ, ಚಂದ್ರಕಾಂತ ಗೌಡ, ಶ್ರೀಕಾಂತ ಕಟಬರ, ಆಸೀಫ ಕಂಕೂರು, ಮನೋಜ. ಡಿ, ಸಲೀಮ ಮೊಕಾಶಿ, ಅರುಣ ಮೇತ್ರಿ, ಮಂಜುನಾಥ ಗಡಗಿ, ಚಾಲಕ ರವಿ ಹಡಪದ್, ಡಿ.ಎ.ಆರ್ ಸಿಬ್ಬಂದಿ ರಾಜು ಅಸ್ನೋಟಿಕರ್, ಶಿವಮೂರ್ತಿ ಗುನಗಾ, ಪರೀಶ ನಾಯ್ಕ, ಸತೀಶ ಕೊಗ್ರೆ ಅವರು ಈ ಯಶಸ್ವೀ ಕಾರ್ಯಾಚರಣೆಯಲ್ಲಿ ಸಕ್ರಿಯವಾಗಿ ಪಾಲ್ಗೊಂಡಿದ್ದರು. ಗೋಕಳ್ಳರಿಗೆ ಕಾನೂನಿನ ಬಿಸಿ ಮುಟ್ಟಿಸಿದ ಪೊಲೀಸರ ಈ ಕ್ರಮಕ್ಕೆ ಸಾರ್ವಜನಿಕ ವಲಯ ಮತ್ತು ಗೋಪ್ರೇಮಿಗಳು ವ್ಯಾಪಕ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
