ಬಾಗಲಕೋಟೆ: ಕೋಡಿ ಮಠದ ಡಾ. ಶಿವಯೋಗಿ ಶಿವಾನಂದ ರಾಜೇಂದ್ರ ಸ್ವಾಮೀಜಿ ಅವರು ಇಂದು ಬಾಗಲಕೋಟೆ ಜಿಲ್ಲಾ ಪ್ರವಾಸದ ವೇಳೆ ಸ್ಫೋಟಕ ಭವಿಷ್ಯವಾಣಿಗಳನ್ನು ನುಡಿದಿದ್ದಾರೆ. ಹಿಮಾಲಯದಲ್ಲಿ ಭೀಕರ ಸುನಾಮಿ ಸಂಭವಿಸಿ ಅದು ಡೆಲ್ಲಿಯನ್ನು ತಲುಪಲಿದ್ದು, ಉತ್ತರ ಭಾರತಕ್ಕೂ ಅಪಾಯ ಕಾದಿದೆ ಎಂದು ಅವರು ಎಚ್ಚರಿಸಿದ್ದಾರೆ. ಇದರ ಜೊತೆಗೆ, ದೊಡ್ಡ ನಾಯಕರಿಗೆ ಅಪಾಯ, ಸಾಮೂಹಿಕ ಹತ್ಯೆಯ ಲಕ್ಷಣಗಳು ಮತ್ತು ಜಗತ್ತಿನ ಇಬ್ಬರು ಮೂವರು ಮಹಾನ್ ನಾಯಕರಿಗೆ ಅಪಮೃತ್ಯು ಸಂಭವಿಸುವ ಆಘಾತಕಾರಿ ಭವಿಷ್ಯವನ್ನು ಸಹ ಅವರು ನುಡಿದಿದ್ದಾರೆ.
ಮಾಧ್ಯಮಗಳೊಂದಿಗೆ ಮಾತನಾಡಿದ ಕೋಡಿಶ್ರೀಗಳು, ರಾಜಕೀಯ, ಪ್ರಕೃತಿ ವಿಕೋಪ, ದೇಶ ವಿದೇಶಗಳ ಸಂಘರ್ಷಗಳು, ರೋಗ ಮತ್ತು ಯುದ್ಧಗಳ ಬಗ್ಗೆ ತಮ್ಮ ಆತಂಕಕಾರಿ ಭವಿಷ್ಯವನ್ನು ಹಂಚಿಕೊಂಡಿದ್ದಾರೆ. ಇತ್ತೀಚೆಗೆ ನಡೆದ ಪಹಲ್ಗಾಮ್ ಉಗ್ರರ ದಾಳಿಯ ಬಗ್ಗೆ ಮಾತನಾಡಿದ ಅವರು, ದೇಶದಲ್ಲಿ ಯುದ್ಧದ ಭೀತಿ ನೆರಳಾಡುತ್ತಿದೆ. ಯುದ್ಧವನ್ನು ಅಲ್ಲಗಳೆಯುವಂತಿಲ್ಲ. ಮತೀಯ ಮತಾಂಧತೆ ಮತ್ತು ಗೊಂದಲಗಳು ಹೆಚ್ಚಾಗಲಿದ್ದು, ಜನರಲ್ಲಿ ಸಾವು ನೋವುಗಳು ಅಧಿಕವಾಗಲಿವೆ ಎಂದು ಅವರು ವಿಷಾದ ವ್ಯಕ್ತಪಡಿಸಿದರು.
ಯುಗಾದಿ ಭವಿಷ್ಯ ನಿಜವಾಯಿತೇ?
ತಮ್ಮ ಹಿಂದಿನ ಭವಿಷ್ಯವಾಣಿಯನ್ನು ಸಮರ್ಥಿಸಿಕೊಂಡ ಕೋಡಿಶ್ರೀಗಳು, ಯುಗಾದಿ ಭವಿಷ್ಯದಲ್ಲಿ ತಾವು ಉತ್ತರದ ನಾಡಿನಲ್ಲಿ ಹಗೆತನ ಹೆಚ್ಚಾಗಲಿದೆ ಮತ್ತು ಸಾಮೂಹಿಕ ಹತ್ಯೆ ಸಂಭವಿಸಲಿದೆ ಎಂದು ಹೇಳಿದ್ದನ್ನು ಸ್ಮರಿಸಿದರು. ಅದರಂತೆ, ಕಾಶ್ಮೀರದಲ್ಲಿ ಹತ್ಯೆ ಸಂಭವಿಸಿದ್ದು ಜಗತ್ತಿನಾದ್ಯಂತ ಪ್ರಸಾರವಾಯಿತು. ಇದು ತಾವು ನುಡಿದ ಭವಿಷ್ಯದ ಮುನ್ಸೂಚನೆ ಎಂದು ಅವರು ಹೇಳಿದರು. ಯುದ್ಧದ ಸನ್ನದ್ಧತೆಯ ಕುರಿತು ಮಾತನಾಡಿದ ಅವರು, ಯುದ್ಧ ಮಾಡುವವರು ಸಿದ್ಧರಿದ್ದಾರೆ, ಆದರೆ ಯುದ್ಧ ಮಾಡಿಸಿಕೊಳ್ಳುವವರು ಹೆದರುತ್ತಿದ್ದಾರೆ. ಎದುರಾಳಿ ಕೂಡ ಸಮಾನ ಮನಸ್ಥಿತಿಯಲ್ಲಿರಬೇಕು ಎಂದರು.
ಧರ್ಮ ಮತ್ತು ಮಾನವೀಯ ಮೌಲ್ಯಗಳು ಮುಖ್ಯ:
ಪಹಲ್ಗಾಮ್ ಉಗ್ರರ ದಾಳಿಯ ಬಗ್ಗೆ ಮಾತನಾಡಿದ ಕೋಡಿಶ್ರೀಗಳು, ಹಿಂದಿನ ಕಾಲದಲ್ಲಿ ರಾಜರು ಗುರುಗಳಿಗೆ ಮಹತ್ವದ ಸ್ಥಾನ ನೀಡುತ್ತಿದ್ದರು ಮತ್ತು ಧರ್ಮದ ಮಾರ್ಗದಲ್ಲಿ ನಡೆಯುತ್ತಿದ್ದರು. ಆದರೆ ಈಗಿನ ಆಡಳಿತಗಾರರಿಗೆ ಗುರುಗಳಿಲ್ಲ ಮತ್ತು ಧರ್ಮದ ಅರಿವಿಲ್ಲ. ಅವರು ಹೇಳಿದ್ದೇ ಧರ್ಮ ಮತ್ತು ಮಾಡಿದ್ದೇ ಆಚಾರವಾಗಿದೆ. ಯಾವುದೇ ಧರ್ಮವಿರಲಿ, ಮಾನವೀಯ ಮೌಲ್ಯಗಳನ್ನು ಒಳಗೊಂಡಿರಬೇಕು. ದಯೆಯೇ ಧರ್ಮದ ಮೂಲ. ಕುರಾನ್‌ನಲ್ಲಿಯೂ ಸಣ್ಣ ಕ್ರಿಮಿಯನ್ನು ಕೊಲ್ಲಬಾರದು ಎಂದು ಹೇಳಲಾಗಿದೆ.
ಅಂತಹ ಮಾನವೀಯ ಮೌಲ್ಯಗಳನ್ನು ಹೊಂದಿರುವ ಅನುಯಾಯಿಗಳು ಹಿಂಸಾಚಾರದಲ್ಲಿ ತೊಡಗುವುದು ಆಶ್ಚರ್ಯಕರ ಎಂದರು. ಪಹಲ್ಗಾಮ್ ದಾಳಿಯು ಭದ್ರತಾ ವೈಫಲ್ಯವೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, ಅದು ಆಳುವ ಅರಸರಿಗೆ ಸಂಬಂಧಿಸಿದ ವಿಷಯವಾಗಿದ್ದು, ಅದರ ಬಗ್ಗೆ ಪ್ರಶ್ನಿಸುವ ಅಧಿಕಾರ ತಮಗಿಲ್ಲ ಎಂದು ಸ್ಪಷ್ಟಪಡಿಸಿದರು. ದೇಶಕ್ಕೆ ಒಳ್ಳೆಯದಾಗಬೇಕು, ರಾಷ್ಟ್ರಪ್ರೇಮ ಇರಬೇಕು ಮತ್ತು ಭಾರತೀಯ ಪ್ರಜೆಗಳಿಗೆ ನೋವಾಗಬಾರದು ಎಂದು ಹಾರೈಸುವುದೇ ತಮ್ಮ ಕರ್ತವ್ಯ ಎಂದರು.
ಇದನ್ನೂ ಓದಿ: ಮೋದಿ ಸರ್ಕಾರದ ಜನಗಣತಿ ಅಸ್ತ್ರ, 15 ದಿನದಲ್ಲಿ ಮುಗಿಸಲು AI ಬಳಕೆ! ಮುಸ್ಲಿಂ ಜಾತಿ ಲೆಕ್ಕಾಚಾರ ಶುರು!
ನಾಲ್ಕು ಬಗೆಯ ಸುನಾಮಿಗಳ ಮುನ್ಸೂಚನೆ:
ಜಗತ್ತಿನಾದ್ಯಂತ ನಾಲ್ಕು ಬಗೆಯ ಸುನಾಮಿಗಳು ಸಂಭವಿಸುವ ಲಕ್ಷಣಗಳಿವೆ ಎಂದು ಕೋಡಿಶ್ರೀಗಳು ಭವಿಷ್ಯ ನುಡಿದಿದ್ದಾರೆ. ಜಲ ಸುನಾಮಿ, ವಾಯು ಸುನಾಮಿ, ಭೂ ಸುನಾಮಿ ಮತ್ತು ಅಗ್ನಿ ಸುನಾಮಿಗಳು ವಿಪರೀತ ತಾಪಮಾನದಿಂದಾಗಿ ಜನರ ಬದುಕನ್ನು ಕಷ್ಟಕರವಾಗಿಸುತ್ತವೆ. ಬೆಂಕಿ ಹತ್ತಿಕೊಂಡರೆ ನಿಯಂತ್ರಿಸಬಹುದು, ಆದರೆ ಭೂಮಿ ಮತ್ತು ಸಮುದ್ರ ಉಕ್ಕಿ ಬಂದರೆ ಏನು ಮಾಡುವುದು ಎಂದು ಅವರು ಆತಂಕ ವ್ಯಕ್ತಪಡಿಸಿದರು. ಗಾಳಿಯಿಂದಲೂ ಅನೇಕ ಸಾವು ನೋವುಗಳು ಸಂಭವಿಸಲಿವೆ ಎಂದು ಅವರು ಎಚ್ಚರಿಸಿದರು.
ಅರಸನಿಗೆ ಕಷ್ಟದ ಕಾಲ:
“ಅರಸನ ಅರಮನೆಗೆ ಕಾರ್ಮೋಡ ಕವಿದೀತು. ಮತ್ತೊಮ್ಮೆ ಸಾಮೂಹಿಕ ಹತ್ಯೆಯಾಗುವ ಲಕ್ಷಣವಿದೆ” ಎಂದು ಭವಿಷ್ಯ ನುಡಿದ ಕೋಡಿಶ್ರೀಗಳು, ಜಗತ್ತಿನಾದ್ಯಂತ ಈ ನಾಲ್ಕು ಸುನಾಮಿಗಳು ಎಲ್ಲವನ್ನೂ ಕಾಡುತ್ತವೆ. ನೀರು, ಬಿಸಿಲು ಮತ್ತು ಗಾಳಿಯ ತೀವ್ರತೆಯಿಂದ ಜನರು ತತ್ತರಿಸುತ್ತಾರೆ. ಈ ವರ್ಷ ಒಂದು ರೋಗ ಬರುತ್ತದೆ ಮತ್ತು ಅದು ಐದು ವರ್ಷಗಳ ಕಾಲ ಇರುತ್ತದೆ. ಇದರಿಂದ ಸಾವು ನೋವುಗಳು ಸಂಭವಿಸುತ್ತವೆ. ಕರ್ನಾಟಕದ ಸುತ್ತಮುತ್ತ ಉತ್ತಮ ಮಳೆಯಾಗಲಿದ್ದು, ಅಕಾಲಿಕ ಮಳೆಯಿಂದಾಗಿ ಮುಂದೆ ಸಕಾಲದಲ್ಲಿ ಮಳೆ ಬರುವ ಸಾಧ್ಯತೆ ಕಡಿಮೆಯಾಗಬಹುದು. ಜನರಲ್ಲಿ ಮತಾಂಧತೆ ಮತ್ತು ಜಾತಿವಾದ ಹೆಚ್ಚಾಗಲಿದ್ದು, ಭೂಕಂಪಗಳು ಹೆಚ್ಚಾಗುತ್ತವೆ. ಭಾರತಕ್ಕೆ ಅಚ್ಚರಿಯ ದುಃಖದ ಪ್ರಸಂಗ ಎದುರಾಗಲಿದೆ ಎಂದು ಅವರು ಎಚ್ಚರಿಕೆ ನೀಡಿದರು.
ರಾಜ್ಯದಲ್ಲಿ ಸಿಎಂ ಬದಲಾವಣೆ ಭವಿಷ್ಯ:
ರಾಜ್ಯದಲ್ಲಿ ಮುಖ್ಯಮಂತ್ರಿ ಬದಲಾವಣೆಯ ಕುರಿತು ಮಾತನಾಡಿದ ಕೋಡಿಶ್ರೀಗಳು, ಸಂಕ್ರಾಂತಿಯವರೆಗೆ ಯಾವುದೇ ಬದಲಾವಣೆಯ ದೋಷ ಕಾಣುತ್ತಿಲ್ಲ. ಇಲ್ಲಿಯವರೆಗೆ ರಾಜನ ಬದಲಾವಣೆ ಆಗುವ ಯಾವುದೇ ಸಾಧ್ಯತೆ ಇಲ್ಲ. ಸಂಗಮೇಶ ನಲಿವನೆ ಆದರೆ ಒಳ ಹಡ್ಡ ಬಂದಿದೆ. ಹೋಳೆಯನ್ನು ಈಜಿದರೆ ಬದಲಾವಣೆ ಆಗಬಹುದು. ಹಾಲುಮತದವರಿಗೆ ಅಧಿಕಾರ ಬಂದರೆ ಬಿಡಿಸಿಕೊಳ್ಳುವುದು ಕಷ್ಟ. ಅವರಾಗಿಯೇ ಬಿಟ್ಟರೆ ನಿಮಗೆ ಸಿಗುತ್ತದೆ ಎಂದು ಅವರು ಭವಿಷ್ಯ ನುಡಿದರು.
ಒಟ್ಟಾರೆಯಾಗಿ, ಕೋಡಿಮಠದ ಶ್ರೀಗಳು ಪಹಲ್ಗಾಮ್ ಉಗ್ರರ ದಾಳಿಯನ್ನು ಉಲ್ಲೇಖಿಸಿ ಯುದ್ಧದ ಭೀತಿಯನ್ನು ವ್ಯಕ್ತಪಡಿಸಿದ್ದು ಮಾತ್ರವಲ್ಲದೆ, ಪ್ರಕೃತಿ ವಿಕೋಪ ಮತ್ತು ರಾಜಕೀಯದ ಬಗ್ಗೆಯೂ ಆಘಾತಕಾರಿ ಭವಿಷ್ಯವಾಣಿಗಳನ್ನು ನುಡಿದಿರುವುದು ಎಲ್ಲರ ಗಮನ ಸೆಳೆದಿದೆ.
ಇದನ್ನೂ ಓದಿ: ಪ್ರತಿದಿನ ಹಸುವಿಗೆ ಆಹಾರ ನೀಡುವುದರ ಆಧ್ಯಾತ್ಮಿಕ ಮತ್ತು ವೈಜ್ಞಾನಿಕ ರಹಸ್ಯ!
